雖然越來越覺得卡通人物主題run搞得太濫，不過作為自黑白Game Boy年代起的忠實fans，始終唔捨得唔參加Pokemon Run！$380嘅參賽費好鬼貴，加上比賽由報名開始至拎選手包一直混亂連篇，尤其因為報名情況太踴躍，以致臨時瘋狂大增名額（小妹都係後補先報到名），令人好難唔擔心重演舊年Nike女子10K有9K要行路嘅災難慘況……（老老實實，你有無試過晨早捕係電腦瘋狂F5都報唔到，結果一班人投訴一輪之後又話加開名額，個server仲要暢通無阻？都咪話唔驚！）
點知去到比賽日，情況又出奇地順利，由等車去會場、寄行李、跑、拎行李、排backdrop影相等等都非常順暢，著實出乎意料之外。
（以下以12月4日星期日5km跑9:15am組別出發為例；都有聽過其他朋友話覺得好迫人嘅。）
讚
1 比賽由一開始唔分批變成分三批起跑，值得一讚，明顯有效分流跑手。畢竟成個活動分兩日進行，調動確實係flexible 啲嘅。
2 比賽路段為大直路，悶就係悶啲，但的確減少擠塞情況，尤其呢啲預左有大量參加者慢行的賽事。小妹跑時幾乎全程無塞過。
有夢夢陪跑！
3 不設大會shuttle bus，唔使行一大輪去馬料水上車然後排半粒鐘上車。其實公共交通去科學園都好方便姐。
4 唔派發行李膠袋，Good！一個行李tag就足夠啦。
5 5k沿途好多公公婆婆負責打氣，好可愛，唔知係咪同社區組織合作請返黎，係就值得一讚。（雖然當中有少部分不甚熱情）
可改善
1 唔知係咪分流做得太好，氣氛都幾弱下。仲有仲有，點解會場啲背景音樂係罐頭歌，唔係「Pokemon！日夜鍛鍊去取勝」架！！
好彩有參加者cosplay火箭兵團助興姐
2 同樣地，點解水站唔直情改名做「小精靈中心」「Pokemon Centre」或者「Pokestop」呢？
3 衝線後不足五米就企滿人，掣都煞唔切，危險！！
4 完場拎獎牌條隊好混亂，連工作人員都躁底。不過對於參加過舊年Nike 10K嘅朋友來說已經不算什麼（抱歉又bin c）
5 送贈嘅索繩袋品質奇差，用一次已爛，重用機會不大，造成浪費。假如好似Nike 10K個袋咁設計得又襟用又靚（嗱，俾返個like Nike）再加個比卡超icon，一定鼓勵到好多參加者繼續帶住佢做運動！
抱歉大部分建議都係衝著Pokemon而來，不過嘅然做得主題Run，當然要搞得越投入越好！
跑後有感：雖然市面上的確出現好多卡通run，好多參加者又確係跑步新手，但見到咁多人跑完1K就開始「百萬行」，實在有點兒唔對路。如果大家真係以喜歡嘅卡通人物run為運動目標，認真練習，最後能夠由未跑過5K到跑完5K或者做出好時間，咁塊精靈球獎牌就變得更有意義！如果大家都抱住呢種心態，卡通run濫下又何妨。
同場好多珍貴Pokemon物品展出，包括呢堆有錢都未必買到的Pokemon世界賽紀念品
（頭盔：以上照片均在跑道以外，或在跑賽期間無停低及阻礙賽事進行之情況下拍攝。）
