唔知大家有沒有見過運動場有跑友戴口罩練習?無錯佢嘅練習係戴住口罩跑而唔係因病戴口罩。
呢類口罩稱可以仿效高原訓練嘅環境，提升運動員嘅帶氧系統。但唔知道大家有沒有試過戴口罩快行嘅感覺?你會感到口罩令你吸到的氧氣減少。有跑友認為咁樣訓練就好似高原訓練嘅環境，空氣中含氧量減少以刺激身體紅血球既數量，有效地提升帶氧能力從而提升耐力。
講到好似好勁咁，我哋試下諗深一層，如果真係work的話，點解仲會有大量職業運動員去海拔2200米以上嘅高原進行訓練呢？其實香港及世界各地都有仿效高原環境嘅低氧訓練室，佢地的目的只係以測試為主。因為高原環境下要提升身體紅血球往往需要幾星期或兩三個月，並非一兩小時嘅訓練然後除左口罩又返去正常含氧量的情況下能夠做到。職業運動員甚至會將高原訓練時抽出黎嘅血喺平原訓練或比賽前打返入自己身體，以增加身體內較強帶氧能力既紅血球。
另外戴口罩跑步其實好危險，因為做運動時身體所需嘅氧氣比平時多，而口罩阻力往往令身體氧氣不足，容易產生缺氧情況。一般運動員第一次去到高原訓練，頭兩三日只會快步行或慢跑，否則好易有高原反應需要休息，甚至返回平原嘅高氧環境。因此各跑友準備使用口罩訓練時要三思。
師兄，其實我都係想改善耐力，等跑步時夠氧啫，可以點玩法？要改善帶氧能力其實好簡單，可以用不同訓練方法去改善：
（1）進行定速的持續跑，將速度控制在70%至85%heart rate（大家可以用心跳錶或自己量度），例如用一個自己10km慢10%至15%既均速跑一個6至8公里。
（2）進行變速跑的訓練，例如400m快100m慢 X10次。
（3）提升抗乳酸能力既訓練有助改善「撞牆」既情況。
下次再同大家分享變速跑及抗酸乳能力既訓練。So easy!
伸延閱讀：長跑攻略之新手八戒（上）
筆者簡介:
跑而優則教。參與長跑十多年由學界紀錄保持者，香港代表隊到長跑教練，身分不停的轉變但對長跑的熱誠不變。希望透過網絡將過往學到的跑步知識及經驗向有心人分享。除了希望發放正能量，亦希望大家知道跑步是一件專業及認真的事情。
特別嗚謝： 中學老師梁sir及王教練啟發我對跑步嘅認知。
