續上回，小妹去年到了台北參加N牌主辦的女子路跑，因為實在難得全程都非常享受，所以食髓知味嚟多Round！
闊落的起跑線
唔少人可能覺得，女子路跑咪就係一堆女仔圍爐自high嘅活動。不過呢個比賽氣氛的確營造得相當好，難度適中而且極多support。加上同女仔一齊跑，某程度上令壓力無咁沉重，適宜做好成績，唔少女生都透過呢個比賽，完成人生第一個半馬，都不失為美事。
是次賽事慢至2小時45分都設有配速員（Pacer），反觀今年香港馬拉松半馬最慢的配速員為2小時05分，更慢的跑手就不能受惠。不過經過實測，可能係Pacer們拉得太散的關係，跑2小時45分的筆者，居然在最後1km先第一次見到Pacer出現……
Support方面，每3km就有一次官方補給，每個站都有水、運動飲品、威化餅、香蕉等等（唔會齋俾水），一定食得飽。再者，中途（尤其進入河濱公園後）有好多local跑團自設補給站，食物就更加豐富，佢地亦會幫手噴舒緩噴霧、按摩等等兼且毫無保留同你打氣，唔止感受到台北人嘅warm，亦好羨慕佢地百花齊放嘅跑團風氣！
官方補給
跑團補給（無圖補充：中途驚見某品牌防曬乳派出大堆猛男幫跑手搽油，令人想入非非！）
去年沿路有唔少官方打氣標語，今年幾乎絕跡，唯有靠民眾自發打氣團搞搞氣氛。（2016）
去到台北路跑，風景當然絕對不輸大部分賽道係封閉高速公路的香港。由市政府門前出發，起點闊到有大概10條車道，幾乎無香港人迫人的問題，好快可以跟隨自己節奏去跑。前半程即使係高架橋，間中亦會經過圓山大飯店等特色景點；到後半程全跑基隆河畔，穿過多個河濱公園，綠油油的河畔大草地，加上四月開得正盛的小白花，今年仲係中途遇到係河邊拉手風琴嘅伯伯，一邊向跑手送上溫暖微笑，個畫面感動到有一秒以為自己置身瑞士！
台灣妹子好自制，有景點如圖中圓山大飯店先會集體係路邊停低自拍。
最後，講到台北路跑最美嘅風景係人，一啲都無錯。唔係講緊台灣妹子嘅外貌，而係佢哋跑起上嚟絕對堅。舊年時間比今年快，大約跑2小時20分咗右，通常係香港跑呢個時間，去到10公里以至中後段，就會有唔少跑手開始放慢墮後。當我期待呢個畫面出現嘅時候，一路跑呀跑，10k、15k、20k……身邊竟然幾乎無人停過落嚟，直至去到終點！成個情形實在令我印象深刻，可見佢哋都真係好努力練習，亦都好想藉機向台灣妹子salute一下。所以呢個比賽都咪話輕鬆，準備好啲先過嚟至唔會失禮呢。
進入河濱公園，向著台北101直跑
今年台北最美一幕
跑到終點，仲可以係偌大嘅河濱公園盡情放鬆、跟大會做cool down，抖夠hea夠先離開，甚至乎有梳妝counter俾姿整女生執返靚個樣先離開。值得一讚係終點返市中心嘅shuttle bus非常充足，即使人龍超長都好快消化。成個賽事感覺良好，跑完仲可以出發去附近溫泉鄉過一晚，消除賽後疲勞，加加埋埋就係個充滿特色嘅路跑之旅，絕對係第一次跑出香港嘅好地方！
賽後的休憩時光（2016）
2017年超豪華實用鏡盒獎牌，比去年一條普通金鍊吸引十倍，明顯整個賽事budget落在獎牌身上，不過我喜歡！
頭盔註：所有相片均在無減速或停於路邊的安全情況下拍攝。
